سال کا پہلا دن: ایوان صدر میں ننھے پھولوں کی آمد

سماجی رابطے کی ویب سائٹ پر ایوان صدر کی طرف سے یہ خبر شیئر کی گئی کہ آج سال کے پہلے دن ایوان صدر کو دن 1 بجے سے 4 بجے تک عام عوام کیلئے کھولا گیا۔ وفاقی دارالحکومت سمیت ملک کے مختلف حصوں سے آنے والے شہریوں نے ایوان صدر کے مختلف حصوں کی سیر کی۔ اس موقع خواتین، بچوں، طلبہ و طالبات اور نوجوانوں کی ایک بڑی تعداد موجود تھی۔

ذرائع کے مطابق شہریوں نے ایوان صدر میں بالکونیاں، باغیچے اور فواروں کے علاوہ ایوان صدر میں نصب خوبصورت ماڈلز دیکھے، ایوان صدرکے عملہ کی جانب سے شہریوں کو معلومات کی فراہمی کیلئے بہترین انتظامات کئے گئے۔ مختلف مقامات پر شہریوں کیلئے پینے کے پانی کی فراہمی کا بندوبست بھی کیا گیا۔ شہریوں نے ایوان صدرکے عملہ کی جانب سے کئے جانیوالے انتظامات کوخوب سراہا اور صدر مملکت ڈاکٹر عارف علوی کی جانب سے ایوان صدر کو عوام کیلئے کھولنے کے فیصلے کی تعریف بھی کی۔ شہریوں نے حفاظتی عملے سے ہاتھ بھی ملائے اور ان کے ساتھ یکجہتی کا اظہارکیا۔ اس موقع پر شہریوں نے پرچم اتارنے کی تقریب میں خصوصی دلچسپی کا مظاہرہ کیا اور موقع پر پاکستان زندہ باد کے نعرے بھی لگائے۔