وزارت حج و عمرہ نے اعلان کیا کہ اس نے عمرہ کرنے اور دورہ کرنے کے لیے سعودی عرب میں عازمین کے داخلے کے طریقہ کار کو اپ ڈیٹ کر دیا ہے۔
ذرائع کے مطابق سعودی وزارت نے کہا ہے کہ سعودی عرب کے باہر سے آنے والے تمام افراد کو اپنی روانگی سے 48 گھنٹے قبل ، چاہے ان کی حفاظتی ٹیکوں کی حیثیت کچھ بھی ہو، منظور شدہ منفی پی سی آر ٹیسٹ یا منفی اینٹیجن ٹیسٹ جمع کرانا لازمی ہوگا۔ وزارت نے تصدیق کی ہے کہ اپ ڈیٹ شدہ طریقہ کار 8 رجب 1443 ہجری بروز بدھ کی صبح 1 بجے سے نافذ العمل ہوں گے۔
یہاں یہ بات بھی قابل ذکر ہے کہ سعودی عرب نے اس سے قبل بدھ، 9 فروری سے شروع ہونے والی نئی سفری پابندیوں کا اعلان بھی کیا ہے۔ وزارت نے کہا کہ نئی پابندیاں مقامی اور عالمی سطح پر وبائی امراض کی صورتحال کی مسلسل پیروی کرنے، مملکت کی جانب سے کووِڈ 19 کے پھیلاؤ کو روکنے اور صحت عامہ کے تحفظ کے لیے کیے جانے والے اقدامات کے حصے کے طور پر متعارف کرائی گئی ہیں۔